BB, 我地又見面喇...

今日係第二次去私家醫生照超聲波. 今日, 我同老公8:15a.m. 就起身, 諗住慢慢同 bb 一齊去TST 食早餐.

我地今日去o左我好鐘意食o既澳門冰室食早餐. 佢地o既奶油脆豬 (即係烘o左o既豬仔包上面夾一片牛油 ~~~ 好肥呀... ), 真係好好味.

我地book o左10:10 a.m. 見醫生, 我地一家3口, 食完一個好好味o既早餐, 再手拖手慢慢行去診所, 好溫馨呀... 去到診所, 唔知係咪早, 唔係咁多人. 又係同我地o既小寶貝 say HI o既時候喇... 當我訓上床照超聲波... HELLO , 小寶貝, 我o既眼淚即刻想湧出來, 當bb o既腳仔撐撐, 老公感動到捉住我隻手.

我地離開診所, 就開始今日睇bb野o既行程. 我地o既第一站, 就係去灣仔, 因聽我表妹講, mattel 開倉, 好多bb玩具. 我地去到, 好多野想買, 不過諗深一層, bb 出年4月先出世, 而且d玩具, 要大d先識玩. 於是, 就乜都冇買.

之後, 我地就去o左太古城o既永安同jusco, 睇bb 野, 佢地做緊discount. 我同老公一到, 就去o左bb 部, 好多人呀... 好多大肚婆呀.. 老公同我拎住朋友send 俾我地個list, 一路揀一路比較. 老公好有心機去compare, 每件產品o既material, 成分, 邊度做都睇得好仔細, 嘻嘻, 而我, 睇睇o下, 都係等老公比較, 我負責陪佢啦. 最後, 我地買o左好少部份o既野, 都千幾蚊 (已經discount o左). 不過為o左我地o既寶貝, 我地會努力o既.. bb 你都要健康成長呀...