不經不覺, 我同老公o既小寶貝, 已經17周零3日了. 因為上次去PWH, Dr. Law 病o左, 所以Dr. Law今個月特登幫我安排多一次覆診. 今日因為係臨時加插, 所以老公請唔到假. 不過唔緊要啦, 老公為o左陪我同bb, 今個月已經請o左2次假, 我就話有attendance cert. 拎, 但佢冇o既, 始終男人應要以事業為重, 我同bb都唔想影響到daddy 工作.. *v*... 所以我今日都唔請埋下午假, 留返下次同老公一齊放.今日約o左9:30a.m. , 始終係返工時間, 所以又好塞車. 我同bb好趕, 9:25a.m. 先到PWH, 我行得好快, 因為公立醫院孕婦很多, 遲o左就有排等. 登記完, 我同bb先做例行檢查 ~ 磅重, 量血壓, 驗小便... 全部正常, 不過又重了1kg, 睇o黎, 我都要注意飲食, 因為Dr. Law 話成個懷孕期, 約重12kg最好, 如果唔係就驚超重, 唔健康.
等了約15mins, 終於聽到我個名, 輪到我了. Hello 我o既小寶貝, 我地又見面了. 一入到房, 同Dr. Law 打完招呼, Dr. Law又同我講唔好意思, 話上次病了幫唔到我覆診. 攪到我都好唔好意思.... 我實在覺得自己好幸福, 因為本來今年Dr. 要做research, 唔接case, 但我妹妹搵佢, 佢都肯接我, 所以每次佢都係特登過o黎睇我... Dr. Law真係好好, 好溫柔, 好細心, 每次都好詳細咁解答我o既問題... 唔怪知我表妹都極力推薦啦... 當我做超聲波時, 我見到bb今日醒o左, 手仔同腳仔不斷撐撐撐~~~ 好似游緊水咁, 好得意呀.... 我問Dr. Law 睇唔睇到bb係男定女, 佢話bb今日雙腳合得好埋. 於是, Dr. Law 係我個肚上面輕輕一壓, 好神奇, bb雙腳輕輕分開. 於是, Dr. 再壓多2下.. 哈哈, 呢個百厭b竟好似2郎神咁將右腳曲放係左腳上面, 好粗魯呀~~~~ ... 連Dr. Law都好驚呀咁講 "佢咁撓隻腳o既".. BB 而家有11.37 cm (不過這是大概, 因bb 開始曲埋d手仔腳仔)... 約200g, 好標準. 跟住就度bb o既頭圍同直經.. 唔, 好好, 好標準... Dr. Law用盡辦法, 2D, 3D都照哂, 都冇辦法睇到bb係男定女. 不過, 佢真係好好, 照o左成15-20 分鐘, 好細心. 佢話要5個月時再照, 可能先睇到. 冇法啦... 不過, 只要bb健健康康, 男仔定女仔都冇所謂啦... 反正佢乖乖同健康成長, 仔女都係自己o既小朋友... bb , daddy mami 好愛你呀... 但Dr. Law 話今次係最後一次o係超聲波見哂成個BB, 因為BB開始大喇, 晝面唔夠位, 下次要逐part照喇...
沒有留言:
發佈留言