老公至愛 ~~ 拍黃瓜

今日, 老公忽然話想食拍黃瓜, 我上網 一 check, 原來有很多唔同o既做法. 有d人話用鎮江黑醋, 有d就冇講明 (不過我睇佢post 出來張相, 應該係白醋) ... 都唔知用那一方法好. 於是, 我就憑自己o既感覺同之前食拍黃瓜o既印象, 鑽研出這味拍黃瓜... 點知, 出奇地咁好味, 連老公都讚不絕口...

Happy Birthday ~~ 細佬....

細佬今個星期生日, 我地一家人去o左大圍果間"小肥牛"打邊爐 ~~ 灼o下灼o下, 正.

大家聽"小肥羊"就聽得多, 而我地第一次接觸小肥牛, 就係老公同佢d同事去打邊爐, 一班男人去吹水... 佢打完返o黎, 就話好好味, 一定要帶我去. 咁, 我一試... 嘩.... 正呀... 佢o既牛同魚刺身, 好新鮮, 即叫即劏....不過, 講到最正, 一定係黃喉同炸腐皮, 真係極品.............

今次, 我地book o左星期五, 8:30. 我同老公半個鐘頭前去到. 嘩.. 好多人係度等位呀... 不過, 都見慣啦. 我地等o左半個鐘, 佢真係好準時8:30俾枱我地 .. (前一張8人枱booking已經係8:15入o左去) , 一去到, 我地就order 好好味o既鱆紅魚刺物同牛刺身 (因為唔order定, 好怏冇). 我地食o左好多, 有花彫肥牛4碟, 鴕鳥肉, 石蠔2碟, 黃喉(本來叫二碟, 不過賣剩一碟 v_v), 本地手切肥牛, 竹笙, 鯊魚嘴, 皇帝菜, 油麥菜, 炸腐皮, 羊肉, 蝦滑... 真係好好味呀... *v*

點紅點綠蒸水蛋

蕃茄, 豆腐同蛋係我o既至愛. 除o左因為佢地營養豐富之外, 仲因為佢地易煮而且變化多, 所以豆腐同蛋係我雪櫃入面必備o既食材. 但蒸蛋成日食, 食得多都會悶, 所以我今日就攪攪新意思 -- 點紅點綠蒸水蛋.

點紅點綠蒸水蛋 ~~ 呢個名, 係我老公改的. 我首先蒸o左水蛋數分鐘, 待蛋面凝固o左後, 再係上面加o左用豆腐, 冬菇, 蕃茄, 芫茜, 火腿, 蔥粒湯, 再蒸多數分鐘. 這樣, 蒸水蛋又滑, 又酸酸甜甜, 餸飯非常o岩, 仲好有營養... ^ｖ^

阿波羅雪糕三文治

昨日同老公放假, 去o左JUSCO Supermarket行街街, 點知, 佢出面o既展覽場, 有個雪糕展. 其實, 雪糕展成日都有, 我地估一定係Dreyer's , Haagen-Dazs, 雀巢等牌子o既天下.. 但係, 竟然仲有阿波羅. 唔知大家仲記唔記得阿波羅雪糕屋呢??!! 我仲好記得佢有一種重點推介 ~ 食o左唔會肥o既低卡路里乳酪雪糕, 成十幾蚊一杯, 真係好好味... 仲有藍戰士, 橙戰神雪條 ~~ 外面係果汁冰冰, 入面包住係香滑士多啤梨, 雲呢拿 or 朱古力雪糕, 真係好美味....

不過, 我地最大發現, 就係佢o既芒果味同朱古力味雪糕三文治 ~~ 我仲記得呢款雪糕三文治係可以o係小學小賣部買到, 不過已經冇見好耐. 於是, 我地買o左一盒, $15 (一盒有4件). 雖然, 昨日天氣不太熱, 但付款後, 我地已經急不及待拆開食. 不過, 拆開個盒後都有d失望. 因為, 我地記得以前係紙盒, 而家係膠袋內再加上一個膠"dun"載住雪糕三文治 ~~ 雖然包裝精美o左, 但站在客人立場, 食果時麻煩o左, 個packing 可以話係失敗之作. 仲有, 唔知係咪小朋友時係食o既方面冇乜選擇, 我記得果時食, 覺得好好味, 但昨日食, 就覺得好普通, 冇乜特別. 唔怪之, 阿波羅雪糕三文治o既市場地位, 可以俾其它雪糕代替. 所以, 我想, 如果你唔進步, 一定變成退步....

忙裡偷閒的一天

難得同老公一齊放假, 於是就去週圍逛 - 飲下午茶 ~ 行商場 ~ 宜家傢俬 ~ 牛頭角下邨... 咁就一日, 真係好寫意.... 我地仲o係宜家傢俬買o左2盆植物 - 荷蘭迷你白掌 & 迷你羅漢松.

其實, 人生點先可以過得開心快樂, 真係好簡單, 好似嘻嘻哈哈咁一日, 真係可以將平日o既工作壓力釋放哂. *v*

牛頭角下邨(Lower Ngau Tau Kok Estate) - 晚飯篇

到o左晚飯時段, 我同老公, 就到o左牛頭角下邨o既牛頭角大排檔食晚飯. 我地8:30P.M.到達... 真係嚇O左我地一跳 ~~~~ 好多人呀... 大排檔出面o既路邊, 擺滿一張一張圓枱, 坐冇虛席. 咁o岩, 有一位侍應經過, 老公就問佢2位邊度有枱, 但個侍應好忙咁話 "要自己去搵枱... " "o下", 咁多人都等緊, 點搵呀. 因為出面太多人等位, 於是, 老公同我就行入一d碰碰運氣, 睇下有冇枱可以等下. 哈哈, 俾我地見到有一張細枱, 有一男一女食完係度傾緊計. 本來阻住人地談心唔係太好, 不過, 無辦法啦, 果度咁多人, 想搵位食飯好難, 仲咁難得佢地食完. 於是, 我同老公就好唔好意思企係佢地附近等位. 果然, 不出我地所料, 佢地好快就走. 好開心呀, 終於有飯食喇... 好肚餓呀...

我o地一坐底, 就order o左4個餸 (我地之前已經做o左資料搜集, 知道有邊d餸麻麻地, 邊d好味), 鹵水拼盤, 煎蠔餅, 黃金軟殼蟹 & 胡椒豬肚粉腸煲. 頭三個餸真係好好味呀... 鹵水拼盤好入味, 特別係d豬大腸, 而煎蠔餅真係好香口, 粒粒蠔都好大粒, 連唔食蠔o既老公都讚不絕口. 講到最頂瓜瓜, 非黃金軟殼蟹莫屬. 外面一層香脆炸蛋黃, 包住軟殼蟹, 真係好好味呀.....

食o左大概個半鐘, 好餓呀.. 就埋單. 其實, 呢種舊式, 咁有地道風味o既大排檔先至係夠鑊氣, 所以
d餸都好野味.... *v*

牛頭角下邨(Lower Ngau Tau Kok Estate) - 歷史見証篇

近年, 有好多香港歷史o既特輯, 都有提及香港僅存的一個徙置區 - 牛頭角下邨. 上星期, 我見到細佬同d朋友都去果度影相同食飯, 做歷史見証. 因為, 牛頭角下邨將會係今個月尾清拆. 於是, 我同老公都趁今日一齊放假, 去果度學人見証一下.

當我們行入去牛頭角下邨, 我第一個感覺係 - 好舊式. 因為, 沿途都係一d違法僭建o既食肆, 不過, 佢入面o既客人, 都係街坊, 所以都洋溢著中國人團結同溫情o既一面. 沿途, 除o左食肆, 還有雜貨店, 小食店, 髮廊, 照相店, 士多, 玩具店, 文具店, 球場, 五金水電舖, 美容院, 香燭店, 大排檔等. 可想而知, 一個牛頭角下邨, 已經可以成為一個小小o既社區.

而牛頭角下邨另一特別之處, 就係它入面的電梯, 只停兩層, 蝦??!! 唔知住頂樓d人返屋企係咪好辛苦呢?

牛頭角下邨是香港房委會轄下的的公共屋邨之一，位於牛頭角北部，於1967年—1969年間興建，毗鄰淘大花園及德福花園，也是香港僅存的未重建前徙置屋邨（截至2008年1月）。牛頭角下邨落成後同時啟用圍繞該邨的牛頭角第一街至第五街。
牛頭角下邨原與政府廉租屋上邨合稱「牛頭角邨」，1973年房委會成立後分拆成為上下邨，當中下邨又分為「一區」及「二區」。
下邨原有14幢第4-5型徙置大廈，第1-7座屬於「一區」，第8-14座屬於「二區」。第1-7座已於2004年完成清拆，於2008年開始重建，工程預計將於2011年完成，剩
無下二區的第8-14座，預計會於2009年5月清拆，成為最後一期公屋重建計劃屋邨。屆時大部分受影響租戶將會被安置往重建完成的牛頭角上邨以及彩盈邨。
第8-12座是香港公屋當中，首度採用預製組件形式建造的徙置屋邨。

牛頭角下邨 (二區)
所屬地區 : -觀塘區
屋邨類別 : -租住屋邨
入伙年份 : -1967年
樓宇座數 : - 7
單位數目 : - 5,406
單位面積 : - 8.2-39.4 m2
住戶數目 : - 3,945
認可人口 : - 9,400

樓宇
樓宇座號 樓宇類型 落成年份 拆卸年份 樓宇層數 備註
第1座 第五型 1967年 2003年 16 重建中
第2座 第四型 1967年 2003年 16 重建中

第3座 第四型 1967年 2003年 16 重建中
第4座 第五型 1968年 2003年 16 重建中
第5座 第五型 1968年 2003年 16 重建中
第6座 第四型 1967年 2003年 16 重建中
第7座 第四型 1067年 2003年 16 重建中
第8座 第五型 1969年 計劃於2009年5月 16 -
第9座 第五型 1969年 計劃於2009年5月 16 -
第10座 第五型 1969年 計劃於2009年5月 16 -
第11座 第五型 1969年 計劃於2009年5月 16 -
第12座 第五型 1969年 計劃於2009年5月 16 -
第13座 第五型 1967年 計劃於2009年5月 16 -
第14座 第五型 1967年 計劃於2009年5月 16 -