2008 東京之旅 (Day 4 ~ 05/11/2008)

到o左第四日, 又到今次旅程第二主菜 - 果園. 我地一心, 諗住可以試一下即採即食水蜜桃, 點知, 原來季節已過, 而家係食提子, 特別係巨峰提子, 好甜好好味, 我仲買走2 packs, 俾媽咪daddy 同奶奶食. 佢地知我帶返香港, 仲幫我pack得好好, 因為提子真係好易爛.

去完果園, 我地就去好出名o既御殿場Premium Outlet. 果度又係一個好大o既outlet, 全部都係名牌, 不過就好貴. 但係, 我地去o既目的, 主要係食入面一間好出名, 最人氣之食店 ~ 漁港直送 沼津回転鮨魚. 果度d海膽同蟹膏壽司, 真係"一流".

之後, 我地今次o既綠色之旅就完結, 剩下餘下兩天o既東京之旅. 返到東京, 我地還o左車, 放下行李, 就向歌舞伎町進發. 果度, 全部串燒店都濟滿人. 我地行o左一陣, 去o左一間要除鞋跪著吃o既串燒店. 我地被安排坐最入o既枱. 點知, 一坐低 ~~~~ 咦 ~~~~ 勁臭. 原來隔離枱個日本人隻腳發出. 到佢地走o左, d味先散. 之後, 我地四周逛逛就返酒店.

2008 東京之旅 (Day 3 ~ 04/11/2008)

到第三日, 我地一如以往, 一早浸一下溫泉, 就出發. 首先, 我地會去最近o既松本城遊覽. 松本城是日本四大國寶城郭之一. 我地冇上去, 不過隔湖觀望, 都感覺到佢o既氣勢. 之後, 我地到車上, 開行李, 因為我地下一站, 係只有7度以下o既上高地. 我地揸o左好耐車, 見到好多車中途泊低, 都唔明做什麼, 到我地正想入隧道之際, 突然有一日本交通督導員叫停我地. 原來, 因上高地每年11月頭開始, 因安全理由, 不准自鴐上山, 只可以搭巴士 or 有許可證o既工作人員車輛. 我地唔想放低o架車太耐, 就轉去附近o既白骨溫泉. 我地去o左一間野天風呂. 正呀... 野天的, 好open, 我諗, 如果出面落雪, 仲好feel. 浸完, 我地就向下一站酒店出發. 下一站, 就係隔離縣, 好遠. 中途, 我地休息一下, 仲有意外收獲, 就係買o左包日本秋田米. 茄哥勁道推介.

2008 東京之旅 (Day 2 ~ 03/11/2008)

今次o既旅程, 驚喜真係一浪接一浪. 到第二天早上, 因為今日o既行程好緊密, 我地4人一早就起身, 趁臨check-out前, 出屋外影相. 點知, 一開門, 我地o既小木屋, 四周都係好靚o既紅葉. 我同老公即刻影相. 紅葉真係好靚. 到check-out完, 我地出發去下一個目標, 就係輕井沢. 輕井沢個outlet 好大, 不過只係我同茄嫂買o左個agnes b 運動袋. 粉紅色o架. 而且仲平表參道3倍. 不過就係夏天款lor. 之後, 我地到o左輕井沢o既JR站行. 果度冇乜野買. 不過, 我地四人買o左d日本蘋果. 因為佢係信州特產. 我地即刻洗乾淨來食. 嘩........ 好Juicy呀........ Yummy Yummy...

行完又食完, 我地又向下一個目標進發 - 雲場池. 聽講, 果度係日本人影婚紗相o既勝地. 我地一落車, 仲撞到有一對香港男女係度影結婚相. 呢度真係好靚好正. 周圍都係紅葉. 睇完紅葉, 我地又鴐車去草津o既湯畑. 本來我地諗住搵一間"日付" o既去浸, 點知果度勁多人, 全部full. 於是我地唯有係街頭浸腳啦. 浸浸下, 我地遇到一個香港旅行團, 仲遇到老公o既同事同老婆添.

浸完腳, 見到附近有一串燒舖, 我地又買來食. 食完, 我地又出發去松本 - 即我地今晚訓o既地方. 果度好凍, 10度以下. 我地去到酒店, 放低行李, 茄哥提議先浸一浸溫泉, 再去搵野食. 我地鴐車去附近o既100 yen 壽司. 果度雖然平, 但款式唔多. 不過我地一樣玩得好開心. 因為我地發現果度係用touch screen 去order 壽司. 當你所order o既壽司由輸送帶送到, 我地張枱o既screen 就會響. 而且, 我地食完d碟, 係可以係枱面個洞口送走. 好好玩.

玩完又食完, 我地四個大細路就去o左附近一間我地平時唔會去o既機舖, 玩太鼓. 又去附近o既24 小時書店睇書. 之後, 我地係咁凍天氣下, 又返酒店浸溫泉. 咁一天o既旅程, 就完了.