產假第一天

好忙呀, 好忙呀 ~~~ 產假正式係由23/3 開始, 不過我19/3已經開始唔駛返工了. 因為, 19/3我上下午都去了覆診, 之後又係星期六日, 於是咪請埋22/3 (星期一), 完正d lor.

三人行

今日心情真係好興奮, 因為我期待同爭扎o左好耐o既影相終於到了, 心情好緊張.

除了同老公影婚紗相外, 今次一家三口第一次一齊影孕婦相, 心情又興奮, 又緊張. 這次影相, 我早在三個星期之前先book. 本來由開始有囡囡豬到2月頭, 我都冇諗過影孕婦相. 因為, 我覺得自己個樣殘o左, 為了囡囡豬o既健康,都冇乜去salon, 又好耐冇做負離子直髮(因為我係天生曲髮的), 又冇做facial (因為我想成個懷孕期都天然d, 冇chemical).

我最初, 仲以為老公會極力反對, 因為老公最唔鐘意影相. 點知~~ 囡囡豬o既魅力真大, 老公一口答應, 仲特登一早請定假陪我地去影... 好感動呀~~~ ^v^ 開始時, 我同老公仲以為我同囡囡豬係主角, daddy 係配角.. 原來我們攪錯了, 第一女主角係我, 第二女主角係囡囡豬, 而老公, 就係第一兼唯一o既男主角. 出乎意料之外, 成個過程都影得好開心, 特別係老公錫囡囡豬時影o既相, 好warm好lum, 真係感受到老公對我同囡囡豬o既愛....

囡囡豬d衫衫

今年o既天氣特別凍, 又潮濕, 所以囡囡豬d衫仔等到今日先開始洗.

本來以為今日會好似昨日咁樣有太陽, 於是一早就預設好時間, 一心諗住一早洗囡囡豬d衫, 早俾太陽d曬, 香d... ~~~ 點知 >~<, 又係天陰, 又濕又有毛毛雨..... 最終, 成間屋掛到好似萬國旗咁, 仲大開抽濕機, 好失望.

2010年初一 ~ 綿綿首次新年

身為虎BB女o既綿綿, 2010年係佢第一年同我 & 老公一家3口一齊過o既新年. 年三十晚, 我地一齊去了奶奶屋企一家人一齊食團年飯. 當晚天氣都幾凍, 又大風, 仲有雨. 回到家, 我同老公就按傳統, 俾了2封壓歲錢綿綿, 希望佢快高長大, 健健康康, 心想事成, 新年進步, 錫錫daddy mummy. 到了年初一臨出門去公公婆婆家拜年前, 我們再給囡囡2封新年利是, 希望佢新年進步, 聰明伶俐, 身體健康, 快高長大. 囡囡, 過o左年後, 你就會好快出來見daddy mummy, 你要乖乖, 到時唔好蝦mummy 呀... 我o既寶貝女... ^v^ 咀咀...

老公帶我同綿綿去維園行花市

今日係年廿九, 仲有2日就踏入虎年(囡囡年.. 因為囡囡今年出世, 係虎BB女).. 今日老公放假, 而我亦特意請了半日假, 同老公囡囡一齊去行花市. 其實, 已經有5年以上冇行花市LOR, 今年我們有了囡囡, 點都要俾佢感受一下新年氣氛. 不過, 我們怕晚上好多人, 所以都係趁中年少D人去.

維園係HK最大型O既花市, 下午都好多人 (但比起晚上時段, 真係好好多). 本來老公拖住我同囡囡, 大家都行得好輕鬆. 今年大部份O既攤檔, 都係D學生攪, 賣D虎型CUSHION, 點知到了中段, 開始迫, 行都行唔到. 老公怕我同囡囡俾人撞親, 即刻一手攬住我地. 嘩, 佢隻手臂真係好粗好WARM 呀. 而我同綿綿都覺得好安全.

講開綿綿, 唔知係咪自己心理作用, 自從我昨晚同佢講DADDY帶我地去行花市, 同佢傾完計後, 佢成朝都好似好興奮咁係咁郁. 好奇妙呀....

白蓮鬚煲雞蛋 ~ 有助清胎毒

昨晚媽咪打俾我, 叫我煲"白蓮鬚煲雞蛋"糖水 (少甜)飲. 因為我本身有皮膚敏感同濕疹, 飲呢款糖水聽講可以幫助清胎毒, 囡囡出世後d皮膚都會好d. 你知啦, 前人講得一定有佢o既道理. 而且做法好簡單, 只要煲 1/2 個鐘就ok, 一星期飲一至兩次就得.

我上網search 過, 人人都話難飲, 因為白蓮鬚帶苦澀味, 似涼茶. 不過, 我飲o左之後, 覺得ok喎, 隻味我接受得到, 不過飲完個口就"鞋鞋"地. 希望囡囡出世後, d皮膚唔好好似我咁差啦...

My Happy B day

今年係綿綿同老公第一次一齊同我慶祝生日, 非常非常開心!!!

老公知我係牛魔王, 非常鐘意食牛扒, 於是, 就帶我同綿綿去一間老牌扒房 ~~ Louis' Steak House慶祝. 當日我心情非常興奮, 因為一早, 我便book 了今天去照4D, 同綿綿見面, 作為獎勵自己o既禮物. 囡囡真係好得意好可愛, 有d人話似我 , 但daddy mummy 就話似老公, 特別係綿綿微微咀笑果陣.. 囡囡, we miss u~~~~ ^0^

到了晚上, 老公就帶我去了這老牌扒房慶祝. 我地點了羅宋湯, 肉眼扒& 奶昔, 全都好好味. 而到最後, 重頭戲了...... 火焰雪山蛋糕. 因為今日係我正日生日, 餐廳送了個火焰雪山蛋糕給我. 這蛋糕, 係由2位waiters, 推住架點了腊燭o既手推車, 上面放了一個雪糕蛋糕送來. 首先, waiter 會將蛋糕放到你面前, 等你許願同切一刀, 跟住, 佢地會同你講happy birthday. 之後, 一位waiter 會在雪糕蛋糕面倒少許lum 酒 & 點火, 再整熄佢. 好特別.

離開了餐廳, 因為食得太飽o既關係, 綿綿頂住, 不可以立刻坐車, 於是, 老公便帶我去附近o既修頓球場睇籃球, 之後我地到了附近o既電腦中心行o左一會, 再回家. 今天我非常開心. ^v^其實, 不論老公帶我去那兒慶祝, 只要我地一家3口一齊就什麼也開心了...

Happy 2010!!!!

2010年, 不論對我、老公 同 家人 o黎講, 都係難忘o既一年. 因為, 我們o既小寶貝 ~~ 囡囡 ~~ 綿綿將會係今年春天出世.

其實2009年對我來說, 真係悲喜交集o既一年. 工作上, 2009 年真係好難過. 因為經濟還未復甦o既關係, 工作壓力係我入行後, 從未遇過咁大壓力. 而在私方面, 綿綿o既出現, 令我o既人生, 出現了一個轉捩點. 她帶給我從未有過o既溫馨與責任感. 綿綿亦令我感到, 我真的成長了, 我就快成為一名媽媽, 囡囡o既出現, 亦叫我不能再任性, 不能再像以前亂花費, 我要學識儲錢, 愛我o既屋企 , 老公, 更愛我o既家人.

雖然, 囡囡要春天先出世, 但她日漸在我o既肚裹長大、郁動, 我都覺得好奇妙、好神奇. 特別係當我去照超聲波時, 見到囡囡由小小o既胎兒, 日漸成長, 係度郁郁, 我o既淚水, 真係每次也不期然想湧出來.

我希望係2010年, 不論我自己、家人與及我身邊o既朋友, 人人也生活得開開心心, 工作順利, 願望成真. 當然, 最重要係綿綿快高長大, 身體健康, 精靈活潑可愛啦. 老公亦要身體健康, 工作順利,永遠都咁愛我 、囡囡 & 我家人. Happy 2010!!!!!